Það er þáttur á Stöð 2 sem heitir Týnda kynslóðin. Ég ætla ekki að fjalla um þáttinn sjálfan heldur nafnið á honum – það er svo innilega merkingarlaust eins og það er sett fram.
Týnda kynslóðin – a lost generation, une génération perdue – er notað um aldurshóp fólks, og þá sérstaklega karlmenn, sem barðist í heimstyrjöldinni fyrri. Heitið á uppruna sinn hjá vinunum og rithöfundunum Gertrude Stein og Ernest Hemingway. Einkunnarorð Hemingways í skáldsögunni The Sun Also Rises frá 1926 eru: „You are all a lost generation.“ Það er tilvitnun í Gertrude Stein.
Þessi kynslóð hafði gengið í gegnum skelfilegar og ónauðsynlegar hörmungar í stríðinu – og þegar því lauk átti hún erfitt með að aðlagast venjulegu lífi. Það sem beið var gjálífi hins ærslafulla þriðja áratugs, heimskreppa og loks uppgangur nasismans. Stein beindi þessu til höfunda á borð við Hemingways, F. Scott Fitzgerald og John dos Passos.
Hér hefur þessi frasi áður verið notaður úr samhengi. Þá voru haldin einhverjar upprifjunarskemmtanir rokk og bítlaáranna undir heitinu Týnda kynslóðin. Það er alveg jafn merkingarlaust og nafn sjónvarpsþáttarins – en auðvitað alveg sárasaklaust.
Gertrude Stein er sögð hafa búið til frasann „týnd kynslóð“, en Hemingway gerði hann frægan. Hér er hún með Alice B. Toklas á götu í París.
