Hægri vængur stjórnmálanna er í mikilli upplausn eftir efnahagskreppu undanfarinna ára. Frjálshyggjan er svo gott sem dauð, en íhaldsmenn vita ekki sitt rjúkandi ráð.  Teboðið fer hamförum í Bandaríkjunum – gamaldags repúblikana hryllir við. Það er heldur ekki mikil hugmyndaleg gerjun, heldur meira um hróp og köll.

Það hjálpar vinstri vængnum ekki mikið, hann er búinn að vera í hugmyndakreppu lengi – sem sér ekki fyrir endann á. Það er merkilegt að þessi kreppa kapítalismans hefur ekki gagnast vinstri mönnum neitt – nema kannski á Íslandi. Það tækifæri kann að vera að renna út.

Inn í þetta stígur höfundur sem nefnist Jay W. Richards. Ugla gefur út bók eftir hann að undirlagi Skafta Harðarsonar. Hún nefnist Peningar, græðgi og guð og þar er reynt að hnýta aftur þessa gömlu enda – kaptítalisma, gott siðferði og guðstrú. Eins og hlutirnir voru áður en galskapur hljóp í kerfið. Richards heldur því fram að meiri en ekki minni kapítalismi sé lausnin á vanda heimsins.

En Richards kemur við á fleiri sviðum, hann er líka menntaður í guðfræði, og hefur verið einn helsti talsmaður þess sem á íslensku kallast vithönnun eða sköpunarhyggja.