Það er líkast að þegar reisa á stúdentagarða telji menn sig hafa leyfi til að reisa sérlega ljót hús. Því stúdentagarðar eiga líklega ekki að vera íburðarmiklir.

Mörg ljótustu hús í bænum eru stúdentagarðar, ekki bara þeir sem standa út við Háskóla, heldur líka stúdentagarðar sem hafa verið reistir við Kennaraháskólann og í Skuggahvefinu – af þeim byggingum eru slík lýti að það getur bara verið tímaspursmál hvenær þær verða rifnar.

Ég átti leið um Bifröst í vikunni og þar er sama sagan, stúdentagarðar sem eru eins og ómerkilegir pappakassar sem er snúið á hvolf. Til mikilla lýta í hinu fagra umhverfi Norðurárdals.

Í fréttunum í gærkvöldi birtist talsmaður háskólastúdenta og furðaði sig á þvi að háskóalayfirvöld vildu ekki umsvifalaust leyfa byggingu stórra stúdentagarða við Oddagötu. Þetta er svæði suðvestarlega í Vatnsmýri – þarna er hið fornfræga prófesorahverfi og Norræna húsið er ekki langt undan.

Og það má teljast öruggt, ef marka má reynsluna, að stúdentagarðar með 340 íbúðum yrðu ekki beinlínis til að fegra þetta svæði.