Núorðið senda margir nokkurn fjölda tölvupósta á hverjum degi, en það er stundum erfitt að vita hvað maður á að skrifa undir tölvupósta.
Í gamla daga meðan enn voru skrifuð sendibréf var þetta ekki mikið vandamál – maður skrifaði oftast með kærri kveðju.
Nú er eins og það þyki svolítið væmið – ég fæ sjaldan tölvupósta með þessari undirskrift, en nota hana reyndar stundum sjálfur.
Algengara er að skrifa með bestu kveðju, en svo fór maður sem ég kannast við að skrifa með góðri kveðju.
Í því felst ákveðin meining – það er ekki jafn innilegt að skrifa með góðri kveðju og með bestu kveðju. Getur meira að segja verið dálítið kuldalegt.
Svo er þetta stundum stytt og notuð skammstöfunin mbk – sem þýðir auðvitað með bestu kveðju. Það er samt ekki sérlega innilegt. Ég hef aldrei séð kveðjuna mgk.
Kuldalegra er að segja bk sem þýðir bestu kveðjur og núorðið sér maður íshrönglið í tölvubréfinu ef einungis er skrifað kv – sem þýðir einfaldlega kveðja.
Getur verið vandasamt, því með þessum litlu orðum má senda meiningarfull skilaboð.
