Í Kiljunni í kvöld förum við norður á Siglufjörð – um göngin frá Akureyri – sem einn viðmælenda okkar á Sigló sagði að væru eins og búlevarður.

Við tókum upp talsvert af efni á Siglufirði, en sýnum nú fyrsta hlutann. Þar fjöllum við um ljóðasetur sem hefur verið sett á stofn í húsi sem hallar skemmtilega og hittum forstöðumann setursins, Þórarin Hannesson, og Pál Helgason sem er ljóðmæltur og gamansamur með afbrigðum.

Emily Lethbridge er ung kona frá Englandi. Hún hefur próf í norrænum fræðum frá háskólanum í Cambridge. Hún er komin til Íslands á stórri Land Roverbifreið og ætlar að ferðast um, lesa Íslendingasögurnar á söguslóðum þeirra, blogga og skrifa bók. Emily kemur á bílnum stóra í þáttinn.

Við tölum líka við Kristof Magnússon. Hann er hálfur Íslendingur og hálfur Þjóðverji, leikritaskáld og skáldsagnahöfundur, en fæst líka við að þýða íslenskar bækur á þýsku. Meðal verka sem hann hefur þýtt eru Grettis saga, Íslenskur aðall og verk eftir Einar Kárason. Hallgrím Helgason og Sigurbjörgu Þrastardóttur.

Páll Biering les ljóð úr bók sem nefnist Speglarnir á leiðinni.

Þorgerður E. Sigurðardóttir og Haukur Ingvarsson fara á bókamarkað, en Bragi sýnir fágætan grip sem gæti verið eftir Bólu-Hjálmar.

Land Rover bíll Emily Lethbridge í snjónum á Íslandi. Bíllinn var áður hersjúkrabifreið. Blogg Emily má finna með því að smella hérna.