Mótmælin gegn niðurskurðinum í leikskólum, grunnskólum og tónlistarskólum í Reykjavík eru farin að valda nokkurri skelfingu meðal meirihlutans í borgarstjórn.

Eitt af því sem veldur óþægindum er að þeir sem mótmæla mest tilheyra þeim sem ætla má að séu í kjósendahópi Besta flokks og Samfylkingar.

Niðurskurðurinn í grunnskólunum er sagður bitna mest á list- og verknámi, auk þess sem áætlanir um aðgerðir gegn einelti komast í uppnám ef gæsla í skólanum er minnkuð.

Tónlistarskólarnir eru þegar á heljarþröm, aðstaða þeirra er langt í frá að geta talist góð og kennsla hefur þegar verið skert talsvert.

Í leiksskólunum er starfað samkvæmt plani sem felur í sér að segja upp fjölda kvenna sem eru við stjórnunarstörf eða lækka þær í launum. Það mælist illa fyrir.

Niðurskurður á þessum skólastigum hefur verið nokkuð í þagnargildi til þessa, enda hefur skólastjórnendum verið gert að tjá sig helst ekki um þessi mál.

En nú blossar umræðan upp og er vægast sagt óþægileg fyrir Besta flokkinn og Samfylkinguna

Sjálfur hitti ég um daginn frammámann í Besta sem stundi upp við mig að flokkurinn hefði tekið við „þrotabúi“ í Reykjavík.

En málið er að borgarbúar vita ekki hver hin raunverulega staða er. Það þarf að skýra það út þannig að það sé skiljanlegt hverju mannsbarni – og um leið þarf að koma skýrt fram hvaða stefnu er fylgt í niðurskurði.

Borgarstjórinn gæti jafnvel tekið heilan þátt af „Tvímælalaust“ undir þetta og boðið til sín Degi og Oddnýju.