Enska sorppressan með The Sun í fararbroddi er sú mest forheimskandi í veröldinni. Hún er þjóðarmein í Englandi.

Fyrir HM voru þessi blöð full af upphrópunum um hið frábæra enska landslið sem myndi fara langt í heimsmeistarakeppninni og líklega sigra, nú væri stundin kominn.

Verst var þetta fyrir leikinn við Þjóðverja, en þá byrjaði pressan að ala á dæmigerðu útlendingahatri með tilvísunum í seinni heimstyrjöldina. Eins og Árni Snævarr bendir á í snjöllum pistli er eru sumir þýsku leikmennirnir fæddir kringum 1990 og þarna eru líka menn sem eru afrískum, tyrkneskum, pólskum og brasilískum uppruna.

Svo eftir tapið snýst sorppressan eins og hýenur gegn liðinu. Í dag gerir The Sun upp leikinn og kemst að því að einungis þrír af ensku leikmönnunum eigi heima í landsliði, það eru þeir Ashley Cole, Steven Gerrard og Wayne Rooney. Sá síðastnefndi var reyndar hræðilega lélegur, en blaðið fullyrðir að hann hafi mikla hæfileika.

En Englendingar hafa verið í þessari stöðu oft áður, að fara á stórmót fullir af væntingum, og koma svo heim með skottið milli lappanna. Hvernig var þetta aftur með leikmennina og konur þeirra – svokallaðar wags – á síðast heimsmeistaramóti?

Nú er aftur farið að heimta enskan þjálfara – er búið að gleyma Steve McClaren? – en það er varla rétta svarið heldur þarf bæði útlendan þjálfara og útlenda leikmenn eins og í ensku deildinni.

Þýska liðið var einfaldlega betra en hið enska í leiknum í gær. Englendingarnir voru þungir og silalegir, Þjóðverjarnir spiluðu bæði taktískt vel og af mikilli gleði.