Nú er Ingibjörg Sólrún að ávarpa þingflokk Samfylkingarinnar í kvöld. Spurning hvort það ef við hæfi – og hvort Geir Haarde, Árni Mathiesen og Björgvin G. Sigurðarson eigi ekki að fá að gera að líka. Þingmenn Samfylkingarinnar munu þurfa að greiða atkvæði um hvort þeir fari fyrir landsdóminn.

Landsdómur á sér vissulega stoð í lögum og það er í raun eðlilegt að þingmannanefndin skuli leggja til að hann sé kvaddur saman, en eins og staðan er sýnist manni að þessi málatilbúnaður sé að fara út um þúfur. Alþingi er ekki að ráða við málið. Ef þetta heldur svona áfram er hætt við að landsdómurinn verði bastarður.

Margt hefur verið ágætlega rannsakað í tengslum við hrunið, skýrsla rannsóknarnefndar Alþingis var til fyrirmyndar – og þingmannanefndinni sem rýndi í hana tókst að draga margar skynsamlegar ályktanir af henni.

En það er líkt og það falli allt í skuggann af landsdóminum. Kannski hefði verið betra að þingið setti á stofn einhvers konar sannleiks- og sáttanefnd – sem myndi þá getað kallað fyrir aðalleikarana i hruninu í opinberar yfirheyrslur.

Og þá ekki bara þau fjögur, Ingibjörgu, Geir, Árna og Björgvin.