BBC bregður upp þessari mynd af skuldabölinu í Evrópu. Þetta er reyndar flókið reikningsdæmi, og ekki alltaf sömu viðmið sem eru notuð, en það má gera ráð fyrir að skuldir Íslands séu í kringum 100 prósent af landsframleiðslu – sem er langt yfir hættumörkum. Að því leytinu erum við í sama flokki og Grikkland og Ítalía. En það er til vandræða að ekki sé hægt að nálgast áreiðanlegt tölur um skuldsetninguna.
Almennt er talið að skuldir eigi alls ekki að vera meira en 90 prósent af landsframleiðslu, 60 prósent hefur verið viðmið Evrópusambandsins, en erfiðlega hefur gengið að fylgja því. Skuldaaukning íslenska ríkissins var mjög hröð og skýrist af falli bankanna, gjaldþroti Seðlabanka, Icesave og hrundum tekjustofnum.
Ef ekki er brugðist við er hætt við að Ísland festist í skuldakreppu til langframa sem getur virkað lamandi á hagkerfið. Niðurskurðurinn sem þarf til að koma í veg fyrir þetta er eitt erfiðasta verkefni sem nokkurn tíma hefur blasað við íslenskum stjórnmálamönnum; það er mikil spurning hvort þeir ráði yfirleitt við þetta. Vinnubrögð á Alþingi og í ríkisstjórn benda ekki til þess.
