BBC fjallar um skóla í Finnlandi sem þykja hinir bestu í heimi. Þrátt fyrir það eru tiltölulega fáar kennslustundir í skólum í Finnlandi. Skóli byrjar heldur ekki fyrr en börnin eru sjö ára. Skólinn er semsagt ekki geymslustaður, eins og stundum vill vera hér á landi.

Það er stöðugur straumur af erlendum sendinefndum til Finnlands til að læra hvernig menntakerfið þar virkar. BBC segir að kennarar séu mikils metnir í Finnlandi. Það séu alltaf til taks aukakennarar til að hjálpa þeim sem dragast aftur úr.

Einnig sé reynt að koma til móts við þá nemendur sem hafa framúrskarandi hæfileika á einhverju sviði. Foreldrar hafa mikil tengsl við kennara, og einnig segir í greininni að hefð sé fyrir bóklestri á finnskum heimilum.