Kanadíski tónlitarmaðurinn Justin Bieber hefur slegið býsna merkilegt met sem Elvis Presley heitinn hafði átt frá árinu 1961. Það ár hafði Presley komið sjö plötum í efsta sæti bandaríska Billboard-vinsældalistans. Presley var aðeins 26 ára þegar hann náði þessum merka áfanga.
Nú hefur Justin Bieber hins vegar leikið sama leik en sjöunda plata hans, Changes, er komin á toppinn í Bandaríkjunum. Frábær árangur hjá Bieber sem er aðeins 25 ára – nokkuð yngri en Presley var þegar hann kom sinni sjöundu plötu á toppinn. Bieber verður 26 ára þann 1. mars.
Í frétt á vef Official Charts kemur fram að Bítlarnir hafi komið sjö plötum á topp Billboard-listans. George Harrison var 25 ára og sex mánaða þegar sjöunda plata Bítlana kom á toppinn, en munurinn þarna er sá að Bieber er sólótónlistarmaður rétt eins og Presley var.
Bieber brást við þessum tíðindum á Twitter þar sem hann sagðist einfaldlega vera „þakklátur“. Þá kastaði hann kveðju á aðdáendur sína á Bretlandseyjum, en platan hans er á toppnum þar um þessar mundir. Átta ár eru síðan Bieber átti síðast plötu í efsta sæti breska vinsældalistans.