Heiðrún Finnsdóttir er tveggja barna móðir og CrossFittari. Hún bæði stundar CrossFit af kappi og þjálfar aðra. Hún heldur úti vinsælli Instagram-síðu þar sem hún deilir ýmislegu tengdu hreyfingu, mataræði og líkamsímynd.

Í nýjustu færslu Heiðrúnar er hún með mikilvæg skilaboð um Instagram vs. raunveruleikann. Hún gaf DV góðfúslegt leyfi til að birta færsluna.

Heiðrún segir að það sé mikilvægt að fólk hætti að bera sig saman við myndir á Instagram. Myndirnar eru uppstilltar og getur manneskjan sem setur myndina inn stjórnað því alfarið hvernig hún lítur út.

„Stopp. Hættu að bera þig saman við uppstilltar myndir á Instagram,“ segir Heiðrún.

„Ég ræð hvernig þú sérð mig á Instagram. Ég get valið uppstilltar myndir, myndir sem sýna mínar bestu hliðar. Myndir sem líta bara ekkert út eins og ég. Glætan að ég standi svona í sundi, ekki séns!“ Segir hún og vísar í uppstilltu myndina.

„Það er mun líklegra að þið sjáið mig óuppstillta með bros á vör að leika við krakkana mína. Og pældu aðeins í því hvort þú hafir yfir höfuð einhvern tímann séð einhvern svona svakalega uppstilltan á almannafæri. Það væri frekar vandræðalegt,“ segir hún og hlær.

https://www.instagram.com/p/B0yAqLAAu0x/

Heiðrún hefur ekki alltaf haft svona mikinn áhuga á hreyfingu og heilbrigðu mataræði. Eftir að hafa prufað alla megrunarkúra og töfralausnir sem völ er á fann Heiðrún sig í PoleFitness og seinna meir CrossFit. Hún segist vilja hjálpa öðrum sem eru í sömu stöðu og hún var. Heiðrún fór yfir sögu sína og litlu sigrana í einlægu viðtali við DV í mars síðastliðnum.

Sjá einnig: Heiðrún prófaði alla megrunarkúra sem völ var á: „Ég gafst upp“ – Fann sig í CrossFit