Ljósmyndarinn Sophie Harris-Taylor opnar á næstunni ljósmyndasýninguna Epidermis í galleríinu Francesca Maffeo í London. Á sýningunni eru tuttugu myndir af ómáluðum konum sem eiga það allar sameiginlegt að glíma við húðvandamál. Með sýningunni vill Sophie opna umræðuna um hvaða andlegu áhrif slæm húð hefur á fólk.
Samkvæmt breskum rannsóknum hafa bólur áhrif á daglegt líf hjá 95 prósent þeirra sem glíma við erfið húðvandamál, en þessi vandamál geta til að mynda haft mikil áhrif á sjálfstraust og sjálfsmat.
Sophie var sjálf með bólur á unglingsárunum.
„Ég var mjög vör um mig og mig langaði í „eðlilega“ húð. Það sem er eðlilegt er skilgreint í gegnum myndirnar sem við sjáum allt í kringum okkur. Við eigum að trúa því að konur eigi að vera með gallalausa húð, en það er ekki svo,“ segir Sophie í samtali við Metro. Hún segir það eflaust koma mörgum á óvart hve margar konur glími við bólur, exem eða rósroða.
„Flestar af þessum konum finna fyrir þrýstingi að fela sig á bak við grímu af farða og hylja það sem gerir þær einstakar. Á sýningunni afhjúpa þessar fallegu konur húð sína með stolti.“
