Athafnakonan Kim Kardashian heimsótti spjallþátt Ellen DeGeneres í gær og talaði meðal annars um þær sögusagnir að hún hafi fótósjoppað dóttur sína North inn á jólakort fjölskyldunnar.
Kim deildi jólakortinu á samfélagsmiðlum í síðustu viku og strax fór sá kvittur á kreik að North litla, sem er sex ára, væri fótósjoppuð. Á kortinu er öll fjölskyldan saman, eiginmaðurinn Kanye West, fyrrnefnd North, Saint, fjögurra ára, Chicago, 23 mánaða og Psalm, sjö mánaða.
Í viðtali við Ellen játaði Kim að sögusagnirnar væru sannar.
„Það fylgir því mikill kvíði að vera með fjögur börn. North var í vondu skapi og ég ákvað að við myndum gera þetta án hennar,“ sagði Kim í þættinum.
„Þannig að ég sagði: Allt í lagi, við fótósjoppum hana bara inn á kortið. Þannig að þetta er ekki tekið á sama tíma. Það tók á taugarnar að ná þessari mynd.“