Yakaly Di Roma, 31 árs gömul kona frá Wales sem vinnur sem ljósmyndari, hefur verið kölluð barnaníðingur fyrir að birta myndir af sér gefa barni sínu brjóst. Þá hafa netþursar einnig sakað hana um að framleiða barnaklám.

Yakaly hefur orðið fyrir svo miklu áreiti að hún ákvað að hætta að gefa syni sínum Hans, fjögurra ára, brjóst á almannafæri, en gefur nýfæddum dreng sínum, River enn brjóst samkvæmt frétt Metro.

Yakaly ætlar samt ekki að hætta að birta myndir af sér að gefa börnum sínum brjóst, þrátt fyrir fyrrnefndar ásakanir, sem hún tekur nærri sér stundum. Hún vonar að myndirnar sýni að brjóstagjöf sé sjálfsagður hlutur.

„Ég hef verið kölluð barnaníðingur fyrir að gefa syni mínum brjóst. Þá hefur mér einnig verið sagt að ég framleiði barnaklám því það að gefa barni sem er jafngamalt og sonur minn brjóst sé „ógeðslegt“ og „truflandi“,“ segir Yakaly. „Flestir eru almennilegir en sumum finnst þetta óþægilegt og það verða alltaf einhverjir sem segja illkvittna hluti. Sem betur fer er flest fólk gott við okkur og sér brjóstagjöf sem náttúrulegan hlut, sem hún er,“ bætir hún við.

Ljósmyndarinn segir brjóstagjöf vissulega hafa tekið sinn toll en að fórnin sé vel þess virði, þar sem þetta séu einstakar stundir á milli móður og barns.

„Fyrir mér er brjóstagjöf mjög sérstök. Hún hefur myndað órjúfanleg tengsl sem ég deili með börnunum mínum. Hans er einhverfur og þetta er það eina sem huggar hann og fyllir hann öryggistilfinningu,“ segir hún. „Þetta er það náttúrulegasta í heiminum og ætti að vera eðlilegt. Það ætti jafnvel að fagna brjóstagjöf,“ bætir hún við.