Gunnar Smári tekur fram í færslu á Facebook-síðu sinni að það sé ekkert efnislega athugavert við greinina, en hann veltir fyrir sér plássinu sem hann fær.
„Ekkert að þessari grein en hvað er Ragnar Þór að gera á þessum stað í Mogganum, sem kallaður hefur verið dauðasætið,” segir hann en í Morgunblaðinu er fastur dálkur við hlið leiðara blaðsins þar sem ýmsir einstaklingar af vettvangi stjórnmálamanna hafa skrifað í gegnum tíðina. Margir hafa þó lent í ákveðnum ógöngum eins og Gunnar Smári bendir á.
„Þarna skrifuðu Lilja Dögg Alfreðsdóttir, Björn Leví Gunnarsson og Svandís Svavarsdóttir á síðasta kjörtímabilið og það gaf þeim ekki mikið. Helga Vala Helgadóttir skrifaði þarna og hrökklaðist af þingi. Áslaug Arna Sigurbjörnsdóttir var þarna og varð því ekki formaður. Það er sagt að fólk skiptist í tvennt, þau sem ganga framhjá vegg sem á stendur „Ný málað“ og þau sem stoppa og reka fingurinn í málninguna. Ragnar er í þeim flokki,“ segir Gunnar Smári.
Gunnar Smári er ekki mikill aðdáandi Morgunblaðsins ef marka má skrif hans og segir hann raunar að þessir stuttu pistlar séu réttlæting blaðsins til að keyra lengst út til hægri.
„Með því að fá fólk úr öllum flokkum til að skrifa fáein orð við hlið leiðarans skapast rými til að fara með leiðarann út á ysta hægrið, þar sem fasisminn er að skjóta rótum enn á ný. Mér vitandi les ekki nokkur maður þessa pistla. Alla vega hafa þeir ekki haft nein áhrif, eins og dæmin sanna.“
