Repúblíkanar í Texas vilja breyta lögum þannig að ólöglegt verður fyrir margar verslanir að selja kynlífsleikföng. Hafa þeir verið sakaðir um að heyja stríð gegn sjálfsfróun.

Blaðið The Daily Star greinir frá þessu.

Verði lögin samþykkt, sem ætla má að verði raunin, munu stórverslanir á borð við Target, Walmart og CVS ekki mega selja kynlífsleikföng lengur. En þetta eru á meðal stærstu og útbreiddustu verslana Bandaríkjanna og ætla má að það verði því mun erfiðara að nálgast slík tól en áður.

Samkvæmt frumvarpinu mega aðeins sérstakar verslanir, eins og kynlífstækjaverslanir og strípibúllur selja kynlífsleikföng.

Tepruskapur Texas búa er reyndar ekki nýr af nálinni. Árin 1973 til 2003 voru kynlífsleikföng beinlínis ólögleg í fylkinu. Árin 2003 til 2008 máttu Texas búar aðeins eiga fimm slík tæki í mesta lagi. Ekki fylgir sögunni hvernig þeim lögum var framfylgt.

Þetta er ekki eina frumvarpið sem stuðningsmenn Trump vilja setja gegn sjálfsfróun. Angela Paxton, öldunardeildarþingmaður frá títtnefndu Texas fylki, hefur lagt fram frumvarp sem gerir það ólöglegt á landsvísu fyrir netverslanir að selja kynlífsleikföng án aldursstaðfestingar.

Samkvæmt frumvarpinu yrði fólk að senda inn afrit af skilríkjum með ljósmynd af sér til þeirrar verslunar sem selur slík tæki. Aldur viðkomandi yrði svo að vera staðfestur af vottuðum þriðja aðila.

„Að þurfa skilríki til þess að kaupa kynlífsleikfang sendir þau skilaboð að unun sé eitthvað sem yfirvöld þurfi að fylgjast með og vakta,“ segir Shamyra Howard, kynlífsfræðingur og félagsráðgjafi, í frétt blaðsins Dallas Observer um málið. „Það sjúkdómsvæðir eitthvað sem er algjörlega eðlilegt og gerir heilbrigða einkahegðun að einhverju sem þurfi að skammast sín fyrir.“