Sorgarmistöð mótmælir framkomnu frumvarpi um rekstur líkhúsa. Segja samtökin að um sé að ræða skattlagningu á dánarbú.
Þorbjörg Sigríður Gunnlaugsdóttir, dómsmálaráðherra, lagði fram frumvarp um breytingu á lögum um kirkjugarða, greftrun og líkbrennslu sem laut að rekstri líkhúsa. En um árabil hafa líkhús verið rekin með litlum efnum og mikil óvissa um lagalega stöðu þeirra.
Samkvæmt frumvarpinu verður kirkjugarði sem starfrækir líkhús heimilt að innheimta gjald vegna geymslu líka. Þetta gjald verði grundvöllurinn að rekstri líkhússins og dekki kostnað vegna launa, húsnæðis, rafmagns, viðhalds, ræstinga, tækja og fleira.
Þetta er Sorgarmiðstöðin, sem beitir sér fyrir hagsmunum syrgjenda, ekki ánægð með eins og kemur fram í umsögn framkvæmdastjórans, Kristín Lilja Sigurðardóttir. Leggur miðstöðin til að frumvarpið verði hreinlega dregið til baka.
„Við lestur greinargerðarinnar sem fylgir frumvarpinu verður ekki annað séð en að kirkjugarðar sem reka líkhús fái lagalega heimild til að reikna inn í væntanlegt líkhúsgjald allan kostnað sem hlýst af rekstri líkhússins og því muni gjaldinu í raun ætlað að standa alfarið undir rekstri viðkomandi líkhúss,“ segir í umsögninni. „Hér er því opnað fyrir möguleika á víðtækari gjaldtöku en sem nemur þjónustu við geymslu líka. Verður ekki annað ráðið af orðalaginu en að í raun sé um skattlagningu á dánarbúum að ræða til reksturs líkhúsa, en ekki þjónustugjald fyrir að geyma lík um tiltekinn tíma.“
Er skorað á Allsherjar- og menntamálanefnd að falla frá frumvarpinu en tryggja þess í stað tímabundið framlag úr ríkissjóði til þeirra kirkjugarða sem reka fullbúin líkhús. Jafn framt verði flýtt heildarendurskoðun á lögunum og samkomulag ríkis og kirkjugarðaráðs frá árinu 2005 endurskoðað. En það fjallaði um framlag úr ríkissjóði til starfsemi kirkjugarða meðal annars til líkgeymslu og reksturs líkhúsa.
