Mikill meirihluti fólks hefur áhyggjur af fölsuðu gervigreindarefni þegar kemur að ferðaþjónustu. Stór hluti hefur einnig áhyggjur af fölsuðum ljósmyndum af ferðamannastöðum.

Þetta kemur fram í könnun sem flugfélagið Icelandair lét gera en fjallað er um hana í flugmiðlinum Airways.

Í könnuninni kemur fram að 78 prósent svarenda hafi áhyggjur af fölsuðum gervigreindar umsögnum um ferðamannastaði, þjónustu og upplifanir. Þá svöruðu 33 prósent því játandi að þeir hefðu áhyggjur af fölsuðum ljósmyndum af ferðamannastöðum.

„Við trúum að alvöru upplifanir, sem ljósmyndarar og fólk á staðnum nær að fanga, nái betur til ferðamanna og hjálpi til við að setja raunhæfar væntingar betur en eitthvað sem gert er með gervigreind,“ sagði Bogi Nils Bogason forstjóri Icelandair. „Þó að þessi tækni eigi sannarlega sinn stað í iðnaðnum er mikilvægt að halda í mannlega hluta ferðalaga og hvetja fólk til að skoða hluti sjálft, af því að ekkert getur komið í staðinn fyrir hið raunverulega.“

Á meðal þess sem kemur fram í könnuninni er að aðeins 19 prósent svarenda segjast kaupa ferð ef þeir vita að kynningarefnið er búið til af gervigreind. 48 prósent segja að umsagnir sem hljómi of góðar til að vera sannar séu algerlega gagnslausar. 52 prósent Bandaríkjamanna telja að það ætti að banna gervigreind við markaðssetningu ferðamannastaða.