Einstaklingur sem segist hafa verið á ferð um Ísland í síðustu viku ásamt maka sínum segir á samfélagsmiðlum frá afar dularfullri heimsókn sem parið fékk í húsnæði sem það gisti í nærri Hellu. Miðað við lýsingarnar var heimsóknin af yfirnáttúrulegum toga og leitar ferðamaðurinn svara við því hvort aðrir hafi upplifað eitthvað í líkingu við þetta.
Parið leigði húsnæðið í gegnum Airbnb. Ferðamaðurinn sem segir frá nefnir að eina nóttina á meðan parið gisti þar hafi verið afskaplega heitt í húsinu og parið hafi átt erfitt með svefn. Fullyrðir ferðamaðurinn að hvorki hann né maki hans hafi fiktað neitt í neinum hitastillingum.
Segir viðkomandi að maki hans hafi vaknað skömmu eftir miðnætti og séð dökkhærða konu sitja á sófa sem sneri að rúminu. Konan hafi setið í sófanum í um 10 sekúndur en svo skyndilega horfið.
Fullyrðir ferðamaðurinn að hann og maki hans hafi verið eina fólkið í húsinu og því hafi verið kyrfilega læst. Hann segir makann standa fast á því að ekki hafi verið um draum að ræða og fullyrði sömuleiðis að þessa sýn megi ekki rekja til svefnrofalömunar sem makinn hafi áður glímt við.
Telur ferðamaðurinn því einu líklegu skýringuna vera þá að þessi skrýtna heimsókn hafi verið af yfirnáttúrulegum toga og óskar eftir svörum um hvort aðrir hafi upplifað eitthvað af þessum toga á ferðum um Ísland:
„Við höfum reynt að finna rökrétta útskýringu en erum að velta fyrir okkur … hefur einhver upplifað eitthvað svona?“
Hann segir parið fram að þessu ekki haft neina vitneskju um draugagang á Íslandi en síðan þetta gerðist hafi hann og maki hans sökkt sér í lestur á þjóðsögum og draugasögum:
„Þessi reynsla fyllti okkur ekki ótta og við erum ekki með neina slæmar tilfinningar út af þessu en þetta var bara skrýtið.“
Segir ferðamaðurinn parið ekki vera alveg viss um hvort nefna eigi draugaganginn við eiganda húsnæðisins en það sé full þörf hjá þeim að ræða við einhvern um þetta. Tekur hann fram að lokum að parið hafi heimsótt kirkjuna í Vík í Mýrdal fyrr um daginn.
Í athugasemdum við færsluna taka nokkrir Íslendingar til máls og fullvissa ferðamanninn um að svona nokkuð sé ekki óalgengt á Íslandi og það sé engin ástæða til að hafa áhyggjur.
