„Allir eru að díla við þetta vandamál. Þú labbar inn og hittir einhvern sem þú þekkir. Blessaður, mamma þín og systir þín og allt þetta, hvað er verið að bralla. Svo bara heyrðu gott að sjá þig við sjáumst,“

segir Bolli Már Bjarnason útvarpsmaður við félaga sinn, Þór Bæring, í þætti þeirra Ísland vaknar á K100. sem segist alltaf fara í Krónuna í Borgartúni. Hann kunni á þá verslun, viti hvar hlutirnir eru og versluninn enn í hring hans og konunnar.

„Svo nærðu þér í mjólk, gúrku, jafnvel furuhnetur, ef þú ert heppinn er blár Maryland sem dettur ofan í. Svo labbar þú fyrir hornið og nei bara: „Þú aftur.“ Og þetta getur gerst fjórum fimm sinnum.“

Félagarnir opnuðu síðan fyrir símann og báðu um ráð frá hlustendum um hvernig ætti að taka á þessum aðstæðum sem greinilega margir tengja við. Búið er að heilsa viðkomandi, taka spjallið og kveðja, síðan er maður alltaf að hitta viðkomandi aftur.

„Pínu fyndið stundum,“ segir Þór.

„Þetta er svo gjörsamlega óþolandi, ég tengi svo, vá! Þú ert búinn að kveðja, sérð hann aftur, kinkar kolli, sérð hann í þriðja skipti. Gaman að sjá þig, bið að heilsa, ætlarðu að skila kveðjunni frá því fyrir tveimur mínútum síðan,“ segir karlmaður sem hringir inn.

„Ég er svo köld þegar ég fer út í búð, ég horfi bara beint fram og á það sem ég er að gera. Ég þoli þetta ekki og nenni ekki að spjalla við fólk út í búð,“ segir kona. Félagarnir segja að líklega sé sagt um hana að hún sé svo góð með sig að hún heilsi ekki, konan játar því. 

„Ég er ógeðslega leiðinleg þegar kemur að þessu, ég bara nenni þessu ekki,“ segir konan sem segist alltaf fara í sömu verslun, en þó í lagi að skoða aðrar búðir, eins og þegar Costco opnaði gerði hún sér ferð að skoða.