Svipað hlutfall er fylgjandi og andvígt vegtollum á Íslandi, 43 prósent eru fylgjandi en 38 prósent eru á móti. Framsóknarmenn eru hrifnastir af vegtollum en Sósíalistar andvígastir.

Þetta kemur fram í nýrri könnun Maskínu.

Þegar gögnin eru greind sést að rúm 13 prósent eru mjög fylgjandi vegtollum en tæp 20 prósent mjög á móti. 18,5 prósent hafa ekki sterka skoðun á málefninu.

Þetta er umtalsverð breyting frá síðustu könnun, frá því árið 2020, en þá voru aðeins 32 prósent fylgjandi en 50 prósent á móti. Í fyrsta sinn eru fleiri fylgjandi en á móti.

Svörin eru nokkuð ólík eftir stjórnmálaskoðunum. Framsóknarmenn eru hlynntastir vegtollum, tæplega 62 prósent þeirra styðja tollana.

50,4 prósent Sjálfstæðismanna styðja vegtolla, 49,6 prósent Viðreisnarfólks, 47,1 prósent Samfylkingarfólks, 42,5 prósent Vinstri grænna, 26,6 prósent Miðflokksmanna, 23,4 prósent kjósenda Flokks fólksins, 22,7 prósent Pírata en aðeins 11,9 prósent Sósíalista.

Þegar litið er til landshluta er stuðningurinn mestur í Reykjavík og á Norðurlandi, það er 47 prósent. Minnstur er hann á Austurlandi, aðeins 27 prósent.

Könnunin var netkönnun gerð dagana 28. til 31. janúar. Svarendur voru 975.