Björgunarsveitir í Borgarfirði voru kallaðar út í nótt vegna tilkynningar frá ferðamönnum sem voru í vandræðum við Kattarhryggi á leið upp á Holtavörðuheiði.

Í tilkynningu frá Landsbjörg kemur fram að ræsi undir veginum hafði stíflast svo flæddi yfir hann á stórum kafla.

Hafði ferðafólk á tveimur bílum lent í vatninu og komst það út úr bílunum og upp á þak þeirra, en þeir voru nánast á kafi í vatninu þegar björgunarsveitir komu á vettvang.

„Svo mikið vatn var á veginum að björgunarmaður í öryggislínu þurfti að synda að öðrum bílanna, þar sem tveir ferðamenn voru á þaki hans og komust hvergi. Einn ferðamaður hafði komist að sjálfsdáðum á þurrt úr hinum bílnum,“ segir í tilkynningu frá Landsbjörg.

Fram kemur að vel hafi gengið að bjarga fólkinu af seinni bílnum og upp úr hálf sex í morgun voru allir þrír komnir í sjúkrabíl til aðhlynningar.

Björgunarfólk hafði þá jafnframt lýst vel upp nágrennið til að tryggja að engir aðrir væru þar ásamt því að veiða upp hluti sem flotið höfðu úr bílunum.

Í kjölfarið var Holtavörðuheiði lokað vegna vatnavaxta.

Meðfylgjandi eru ljósmyndir frá vettvangi í nótt, þar sem meðal annars má grilla í björgunarmann á sundi að bílnum á einni þeirra.