Fyrir skömmu dó blíður og mannelskur fjölskylduhundur í Vogum, Astro. Hann var átta ára gamall. Banamein Astros var eitrun en honum hafði verið byrlað rottueitur.

„Já, það kom skýrt fram í blóðinu, rauðu blóðkornin fóru niður og hvítu upp. Dýralæknirinn útskýrði fyrir mér að þetta er rottueitur,“ segir Sandra Rozycka, eigandi Astros.

Astro var labrador, blandaður við border-collie. Hann var elskaður fjölskylduhundur og segist Sandra ekki vita til þess að neinum hafi verið í nöp við hann. En einhver hefur samt eitrað fyrir honum. Hefur Sandra einhvern grunaðan?

„Það var nágrannakona alltaf að gefa honum súkkulaðirúsínur. Ég sagði við hana að hann mætti ekki fá rúsínur og súkkulaði og hún hætti því um tíma eftir það.“ – Sandra segist ekki vera að ásaka nágrannakonuna um þetta en hún kemur helst upp í hugann þegar leitað er að afskiptum ókunnugra af hundinum.

Sandra bendir jafnframt á að fjölmargir heimiliskettir hafi horfið í Vogum undanfarinn mánuð, óvenjumargir. „Svo hafði kona samband við mig og sagði mér frá því að hún hafi átt kettling sem fékk allt í einu hjartaáfall í höndunum á henni. Okkur grunar að hann hafi líka orðið fyrir eitrun.“

Rottueitur er stórhættulegt hundum og köttum og getur dregið dýrin til dauða. Það er grafalvarlegt athæfi að úða eitrinu á víðavangi eða húslóðum. Sandra bendir á að kettir gangi iðulega lausir og þeir geti dreift eitrinu með hárum.

Aðspurð segist hún hafa tilkynnt málið til lögreglu með tölvupósti en ekki lagt fram formlega kæru. „Ég hef engar sannanir um hver var að verki svo ég veit ekki hvort lögreglan vill rannsaka þetta.“

Hún er þó með gögn í höndum um hvað dró hennar hund til dauða og stefnir á að hringja í lögregluna í dag. Hún hvetur jafnframt gæludýraeigendur í Vogum til að vera á varðbergi. Hér er hugsanlega einhver að verki sem ber illan hug til dýranna, svo einkennilegt sem það er.