Donald Trump, verðandi Bandaríkjaforseti, hefur farið mikinn síðustu daga og ýjað að mögulegum landvinningum Bandaríkjamanna. Hann byrjaði á því að stríða Kanadamönnum og leggja til að landið myndi ganga í Bandaríkin og verða þar með 51. fylki landsins,

Talsvert meiri alvara var þó á bak við yfirlýsingar Trump rétt fyrir jólin að Bandaríkin ættu að kaupa Grænland og taka yfir Panama-skurðinn. Hugleiðingarnar um Grænland eru bergmál frá fyrri forsetatíð Trumps þar sem hann lýsti yfir sama áhuga. Á dögunum sagði hann að Grænland væri algjörlega nauðsynlegt varðandi þjóðaröryggi Bandaríkjanna og frelsi heimsbyggðarinnar.

Dönsk yfirvöld, sem og Grænlendingar sjálfir, hafa slegið hugmyndina gjörsamlega út af borðinu en Danir eru þó uggandi og hyggjast setja meira púður í varnir eyjunnar ísilögðu.

Hugmyndir Trumps um Panama-skurðinn eru hins vegar nýjar af nálinni. Í hugleiðingum á samfélagsmiðli sínum, Truth Social, sagði hann að verið væri að okra á Bandaríkjamönnum varðandi flutninga í gegnum skurðinn og að Kínverjar væru farnir að vera þar afar áhrifamiklir. Varpaði hann því svo fram að mögulega ættu Bandaríkjamenn að taka yfir skurðinn mikilvæga að nýju.

Panama-skurðurinn var byggður af Bandaríkjamönnum og opnaði árið 1914. Bandarísk yfirvöld stýrðu flutningsleiðinni til ársins 1977 þegar skurðurinn var afhentur stjórnvöldum í Panama. Bandaríkin eru helstu notendur flutningsleiðarinnar en Kínverjar eru þar í öðru sæti og hefur notkun þeirra farið ört vaxandi hin síðari ár.

Sonur Trump, Eric, kynnti svo undir málinu með því að birta mynd á samfélagsmiðlinum X þar sem Bandaríkin hafa sett Grænland, Panamaskurðinn og Kanada í vörukörfu í netverslun Amazon.

Sérfræðingar telja ólíklegt að þessar vangaveltur Trump um Panama-skurðinn og Grænland raungerist en segja þær þó gefa vísbendingar um að Trump ætla að láta meira til sín taka á alþjóðasviðinu en á fyrri forsetatíð sinni. Heimbyggðin muni ekki fara varhluta af því.

Trump mun taka við völdum í Bandaríkjum þann 20. janúar næstkomandi.