Carlo Ancelotti vildi ekki fá Kylian Mbappe til Real Madrid í sumar að sögn fyrrum franska landsliðsmannsins Emmanuel Petit.

Mbappe kom til Real frá Paris Saint-Germain í sumar en hefur farið nokkuð hægt af stað með sínu nýja félagsliði.

Um er að ræða einn besta sóknarmann heims en Petit er á því máli að margir á vegum Real hafi ekki viljað sjá þessi skipti ganga í gegn í sumarglugganum.

,,Ég er viss um það að Carlo Ancelotti og nokkrir leikmenn Real Madrid hafi ekki viljað fá Kylian Mbappe í sumar,“ sagði Petit.

,,Þetta var búningsklefi skipaður leikmönnum sem höfðu unnið deildina og Meistaradeildina og hans koma skapar ekkert nema vandræði.“

,,Ancelotti var á hátindi lífsins eftir að hafa unnið Meistaradeildina og ég held að hann hafi viljað fá inn kannski tvo leikmenn en engin stór nöfn.“