„Eins allir vita þá hafa flest heimili verið þvinguð úr óverðtryggðum lánum yfir í verðtryggð vegna okurvaxta fjármálakerfisins enda stendur ekkert heimili undir rúmlega 10% húsnæðisvöxtum. En uppundir 60% af húsnæðislánum heimilanna eru núna verðtryggð,“ segir Vilhjálmur í færslu á Facebook-síðu sinni.
Hann er ómyrkur í máli í garð Íslandsbanka.
„Það er þyngra en tárum taki að verða vitni að þeirri „rányrkju“ sem Íslandsbanki ástundar á sínum viðskipta“vinum“ en núna hefur bankinn hækkað breytilega verðtryggða vexti á húsnæðislánum um 0,80% á síðustu 63 dögum! Á sama tíma hafa stýrivextir lækkað um 0,75% og allir greiningaraðilar spá því að verðbólgan muni ganga hratt niður og verði jafnvel komin í 4,5% í þessum mánuði og niður í 3,8% í febrúar á næsta ári.“
Sjá einnig: Gagnrýna Íslandsbanka fyrir vaxtabreytinguna í dag – „Þetta er ógeðslegt, óboðlegt og til skammar“
Hann segir að botnlaus græðgi fjármálakerfisins eigi sér engin takmörk og bendir á að arðsemi eigin fjár Íslandsbanka hafi verið 13,2% á þriðja ársfjórðungi.
„En hugsið ykkur, verðbólga er að lækka, stýrivextir eru að lækka, verðbólguvæntingar eru að lækka og því er spáð að hagvöxtur verði 0% á þessu ári. Þrátt fyrir þetta hefur Íslandsbanki hækkað breytilega verðtryggða húsnæðisvexti um 0,80% á síðustu 63 dögum.“
Vilhjálmur varpar svo ljósi á það hvað þetta þýðir fyrir hinn venjulega Íslending sem er með verðtryggt húsnæðislán hjá Íslandsbanka.
„Jú, þetta þýðir að á síðustu 63 dögum hefur vaxtabyrði af 45 milljóna húsnæðisláni með breytilega vexti á verðtryggðu láni í Íslandsbanka hækkað um 30 þúsund á mánuði eða 360 þúsund á ársgrundvelli.“
Bendir hann á að til að hafa 30 þúsund krónur í ráðstöfunartekjur þurfi viðkomandi einstaklingur með slíkt lán hjá ÍB að hafa launatekjur sem nema 47 þúsundum á mánuði.
„Já takið eftir ÍB hefur tekið 47 þúsund af launatekjum sinna viðskipta“vina“ sem eru með lán miðað við áðurnefndar forsendur. Ég óttast að aðrir bankar fylgi í fótspor Íslandsbanka enda á græðgi fjármálakerfisins sér engin takmörk.“
Vilhjálmur sendir að lokum ákall til stjórnvalda:
„Ég spyr: Hvar eru stjórnvöld? Hvar eru þingmenn? Ætla menn að láta fjármálakerfið komast upp með það að hækka verðtryggða vexti um 0,80% á sama tíma og stýrivextir lækka um 0,75% og verðbólga á hraðri niðurleið?
Munum að ef stjórnvöld gátu lokað almenning inni í húsum sínum, lokað skólum, sundlaugum og bannað fólki að fara í sumarbústað vegna Covid þá hlýtur að vera hægt að tryggja lagasetningu til að vernda almenning fyrir þessari rányrkju sem fjármálakerfið ástundar á heimilum þessa lands!
Munum að okurvextir og verðtrygging eru ekkert náttúrulögmál heldur mannanna verk sem hægt er að breyta. Það eina sem þarf er kjarkur, vilji og þor!“
