Emmanuel Petit, fyrrum leikmaður Arsenal, telur að félagið þori einfaldlega ekki að semja við Paul Pogba á næsta ári.
Pogba er að leita sér að nýju félagi en hann hefur yfirgefið lið Juventus þar sem samningnum var rift.
Pogba er 31 árs gamall miðjumaður en hann hefur undanfarið ár verið í banni frá fótbolta vegna steranotkunar.
Frakkinn þekkir til Englands eftir dvöl hjá Manchester United og er orðaður við endurkomu en Petit telur að Arsenal verði ekki hans áfangastaður.
,,Það er mjög mikilvægt að hann velji rétt félag og að það félag sé að semja við leikmann með mikinn metnað. Þetta er stór ákvörðun fyrir Paul,“ sagði Petit.
,,Hann verður 32 ára gamall í mars svo hver er áhættan? Hann fær ekki mikið borgað vegna þess sem hefur skeð undanfarin tvö eða þrjú tímabil.“
,,Hann mun fá ágætis samning og mun væntanlega fá launahækkun ef hann nær að spila ákveðið marga leiki.“
,,Ég er ekki viss um að stórt lið eins og Arsenal þori að taka leikmann eins og Pogba. Þið þurfið að muna eftir sumum stórstjörnum sem sömdu við Arsenal og flestar af þeim stóðust ekki væntingar.“
