Didier Deschamps, landsliðsþjálfari Frakklands, fékk svo sannarlega að heyra það frá stuðningsmönnum franska landsliðsins í vikunni.

Deschamps hefur starfað sem landsliðsþjálfari frá árinu 2012 og spilaði yfir 100 landsleiki á sínum leikmannaferli.

Eins og flestir vita var Kylian Mbappe ekki valinn í hóp franska liðsins fyrir núverandi verkefni í Þjóðadeildinni en hann er talinn einn besti ef ekki besti leikmaður liðsins.

Mbappe var því ekki til taks á fimmtudag er Frakkland gerði óvænt markalaust jafntefli við Ísrael á heimavelli.

Það var baulað á franska liðið eftir lokaflautið og hefði liðið getað nýtt Mbappe í leiknum sem er á mála hjá Real Madrid.

Stuðningsmenn franska liðsins hafa verið að keppast um það að bauna á Deschamps en samband hans og Mbappe er ekki gott í dag.

Talið er að Mbappe hafi engan áhuga á að spila fyrir landsliðið áður en nýr landsliðsþjálfari kemur inn sem eru ekki góðar fréttir fyrir þá frönsku.

Það verður fróðlegt að sjá hvort Deschamps reyni að ná til Mbappe fyrir næsta verkefni í mars en næsti leikur liðsins er á sunnudag í sömu keppni gegn Ítalíu á útivelli.