Troy Deeney fyrrum framherji Watford í ensku úrvalsdeildinni segir frá því hvernig hann eyddi 45 milljónum króna á þremur dögum í Las Vegas.

Deeney hafði lofað vinum sínum að fara með þá til Vegas ef Watford kæmist upp í ensku úrvalsdeildina.

Deeney og Watford flugu upp árið 2015 og hann var að standa við loforðið.

„Ég myndi elska að segja ykkur að þetta hefðu verið veðmál. Ég borgaði 80 þúsund pund fyrir sundlaugapartý, 80 þúsund pund um nóttina og 60 þúsund pund um kvöldið. Ég gerði samning við félagana,“ sagði Deeney

Hann segir frá því hvernig þetta allt fór fram. „Það voru fimm fótboltamenn þarna við hlið okkar á skemmtistaðnum, við vorum að panta okkar fyrstu drykki en þeir voru að panta á sama tíma.“

„Við fengum drykki en þeir komu með tíu flöskur út. Ég sagði við vini mína að þeir gætu ekki verið með þessa stæla, ég væri í úrvalsdeildinni en þeir ekki. Svo ég pantaði 20 flöskur.“

„Þetta var bara egó, ég var mesti rasshausinn. Ég gæti alveg notað 250 þúsund pund í dag.“

Eftir eyðsluna á fyrsta degi ákvað staðurinn að bjóða Deeney allt frítt næsta kvöldið og voru 15 fyrirsætur frá Victoria Secret mættar til þeirra.

„Hún bað mig um að biðja vini mína að hætta að taka myndir, hún sagðist starfa fyrir Victoria Secret.“