Leikkonan skemmtilega Juno Temple hefur gefið í skyn að þáttaröðin Ted Lasso sé að snúa aftur á skjáinn eftir stutt hlé.

Þar er fjallað um bandarískan þjálfara sem reynir fyrir sér sem knattspyrnustjóri á Englandi í fyrsta sinn og tekur við liði sem ber heitið ‘AFC Richmond.’

Þættirnir voru gríðarlega vinsælir en eftir þrjú ár í loftinu var ákveðið að hætta tökum og einbeittu leikararnir sér að öðrum verkefnum.

Temple sem fer með stórt hlutverk í þáttunum hefur ýtt undir þær sögusagnir að fjórða serían sé líkleg en hún neitar að staðfesta það að svo stöddu.

Þættirnir fengu frábær viðbrögð frá bæði gagnrýnendum og áhorfendum en þeim lauk á síðasta ári.

,,Ég meina, ég vona það svo sannarlega en ég er ekki beint viss um neitt í dag,“ sagði Temple við Hollywood Reporter.

,,Ég hef þó heyrt að það gæti verið möguleiki svo það er afskaplega spennandi.“

Aðdáendur Ted Lasso hafa látið í sér heyra á samskiptamiðlum og eru margir að naga neglurnar og bíða eftir því að fá staðfestingu á þessum fregnum.