Gus Poyet, fyrrum leikmaður Chelsea, telur að það séu ágætis líkur á að Darwin Nunez muni vilja yfirgefa Liverpool á næsta ári.

Nunez hefur spilað 62 mínútur í ensku úrvalsdeildinni á tímabilinu eftir að hafa spilað reglulega á síðustu leiktíð en það var þó undir Jurgen Klopp.

Arne Slot tók við Liverpool í sumar og virðist hafa lítinn áhuga á að nota úrúgvæska sóknarmanninn.

,,Þetta veltur allt á þér og þér einum. Sumir leikmenn geta sætt sig við þetta, þeir samþykkja sína stöðu í liðinu,“ sagði Poyet.

,,Það eru hins vegar aðrir sem vilja leita annað og fá að spila meira. Þetta er bara undir honum komið, hversu ánægður hann er og hversu ánægð hans fjölskylda er.“

,,Þetta er persónulegt mál og ekki auðvelt mál. Sumir geta aðlagast en sumir ekki.“