Kona sem býr í miðbæ Reykjavíkur kom að tveimur erlendum konum að spreyja húsið hennar. Hún er orðinn þreytt á veggjakroti og vildi vara aðra við þessu.
Í samtali við DV segist konan hafa komið að tveimur ungum konum, líklega á þrítugsaldri, sem voru byrjaðar að spreyja málningu á hornið á húsinu hennar. Eins og sést á meðfylgjandi myndum er málningin gul á hvítum vegg hússins, en konunum tókst ekki að klára verkið.
Önnur þeirra, ökumaðurinn sem hafði sig meira í frammi, byrsti sig við konuna þegar hún sagði þeim að stoppa. Konurnar útlensku höfðu einnig lagt bíl sínum ólöglega upp á gangstéttinni, þvert fyrir gangbraut. Segir Konan svívirðingarnar frá þeim hafa verið á ensku.
„Hún fór að skammast í mér vegna þess að hún væri ólétt,“ segir konan.
Eftir þetta höfðu þær sig á brott. Segir hún þær hafa verið á hvítri Citroen bifreið. Hún hafi séð að þær voru með fleiri stensla í bílnum.
Konan birti færslu um málið í hverfagrúbbu á samfélagsmiðlum og varar við konunum.
Í athugasemdum velta sumir fyrir sér hvort að tilgangurinn hafi verið að skipuleggja innbrot. Það er að innbrotsþjófar merki gjarnan hús og hafi þróað með sér ákveðið merkjamál. Til dæmis til að láta aðra vita hvers konar fólk eigi heima í viðkomandi húsi, hvort þar sé verðmæti að finna og hversu vel þeirra er gætt.
Aðspurð um þetta segir konan ekki hafa trú á að það hafi verið tilgangurinn. Heldur til að koma með einhvers konar skilaboð. Það hjálpi þó ekki téðum málstað að spreyja veggjakroti á eignir annarra. Veggjakroti geti fylgt mikill kostnaður fyrir eigendur húsa, sem þurfa að leggja út fyrir og hafa fyrir því að mála vegginn eftir á.
Veggjakrot er skilgreint sem eignaspjöll. Í 257. grein almennra hegningarlaga segir að hver sem ónýti eða skemmi eigur annars manns eða sviptir hann þeim skuli sæta sektum eða fangelsi allt að 2 árum.
Þrátt fyrir þetta gerir lögregla lítið eða ekkert í veggjakroti. Orðið veggjakrot kemur ekki á einum stað upp við leit í dómasafni Dómstólasýslunnar.
