Björgunarsveitinni Lífsbjörg í Snæfellsbæ barst útkall upp úr klukkan 14 í gær vegna manns sem hafði komið sér í sjálfheldu í gili austan Rauðfeldargjár.

Í tilkynningu frá Landsbjörg kemur fram að maðurinn hefði klifrað um 30 til 40 metra hæðarmetra upp bratt gil og treysti hann sér ekki niður aftur.

„Verkefnið var krefjandi og reyndi á klifurfærni björgunarfólks á bröttustu köflunum en auk þess var mikil grjóthrunshætta niður gilið,“ segir í tilkynningunni.

Björgunarfólk fór upp fyrir manninn, setti upp línur og seig niður til hans þar sem hægt var að tryggja hann í línu og aðstoða niður.

Að sögn Landsbjargar var maðurinn nokkuð kaldur og skelkaður þegar niður var komið, en þó feginn að komast úr brattlendinu. Verkefnið tók rúma 4 tíma og alls voru 8 félagar sem tóku þátt.

Meðfylgjandi eru ljósmyndir teknar í aðgerðinni.