Það að Rússar hafa ekki enn gripið til neinna markverðra aðgerða gegn úkraínska innrásarhernum, er vandamál fyrir Vladímír Pútín, Rússlandsforseta, og ímynd hans sem hins sterka manns sem verndar Rússar.
„Pútín virðist veikari en áður því enn hefur ekki verið gripið til neinna aðgerða,“ sagði Flemming Splidsboel, sérfræðingur í rússneskum málefnum hjá dönsku hugveitunni Dansk Institut for Internationale Studier í samtali við B.T. og bætti við: „Þetta er öðruvísi en á úkraínsku svæðunum sem Rússar hafa innlimað og kalla þar með rússneskt landsvæði en Úkraínumenn hafa enn yfirráð yfir þessum svæðum. Til dæmis stórborginni Kherson. Innrásin í Kúrsk særir Rússa meira, því þetta er hið raunverulega Rússland. Rússneskt dagblað sagði Kúrsk vera 1.000% rússneskt og að það að eftir 18 daga hafi ekki verið brugðist við, annað en með einhverjum skipulagsbreytingum hjá hernum, er athyglisvert.“
Katazyna Zysk, prófersso við norsku varnarmálarannsóknarstofnunina, IFS, sagði í samtali við Dagbladet að Pútín virðist ekki vera sú leiðtogaímynd sem hann hefur eytt miklum tíma og kröftum í að byggja upp.
Hún vísaði meðal annars til nýlegs fundar Pútíns í Kreml með æðstu yfirmönnum hersins, héraðsstjórum og embættismönnum. Fundinum var sjónvarpað. „Þarna var hann með hershöfðingjunum sínum og öðrum leiðtogum og virtist Pútín standa mjög veikt að vígi. Hann hefur byggt upp ímynd sína sem sterks þjóðarleiðtoga, mann sem hefur stjórn á hlutunum og getur verið harður í horn að taka. Nú virðist hann ákvarðanafælinn. Hann hefur ógnað Vesturlöndum með kjarnorkuvopnum og reynt að virðast mjög karlmannlegur leiðtogi. Það sem við sjáum núna, er algjör andstæða þeirra ímyndar sem hann hefur byggt um sjálfan sig og er áfall. Það sem við sjáum í Kúrsk er niðurlæging Rússlands sem þjóðar. Þrátt fyrir að enginn segi það upphátt, þá getur Rússland ekki leyft þessu að viðgangast,“ sagði hún.
