Allt frá því að Rússar réðust inn í Úkraínu hefur yfirstjórn hersins verið gagnrýnd fyrir þá taktík sem beitt hefur verið. Voru hermenn sendir beint í dauðann og var til dæmis sagt að orustan um Bakmút hefði verið hrein „hakkavél“. Þar voru rússneskir hermenn sendir beint út í opinn dauðann. Taktíkin var að treysta á að með fjöldanum næðist árangur, úkraínsku hermennirnir myndu einfaldlega verða uppiskroppa með skotfæri þegar hermenn streymdu fram í nærri endalausum röðum.

En nú hefur Vladímír Pútín, Rússlandsforseti, breytt um taktík. Nú sækja Rússar ekki fram í bylgjum eins og áður, nú reyna þeir hægt og rólega að leggja land undir sig með því að þreyta úkraínsku hermennina.

Bandaríska hugveitan Institute for the Study of War skýrir frá þessu í umfjöllun sinni um gang stríðsins. Bendir hún á að þessi taktík sé í takt við það sem Pútín sagði þegar hann ávarpaði þjóð sína 8. júní síðastliðinn. Þá sagði hann að rússneskar hersveitir muni sækja hægt og bítandi fram um óákveðinn tíma og Úkraínumenn geti ekki gert neina gagnsóknir, að því að heitið geti, og þannig muni Rússar sigra í stríðinu.

Vestrænar leyniþjónustustofnanir telja að í maí hafi rúmlega 1.000 rússneskir hermenn fallið eða særst á vígvellinum í Úkraínu á degi hverjum. The New York Times skýrir frá þessu.