Þann 10. maí hóf rússneski herinn nýja sókn í Kharkivhéraðinu í Úkraínu en það liggur upp að Rússlandi. Á nokkrum dögum náði rússneski herinn að sækja 10 km fram í héraðinu. Sérfræðingar segja að ástæðan fyrir þessum árangri Rússana sé að stórum hluta vegna svifsprengna sem þeir nota af miklum móð.

Framsókn Rússanna varð til þess að Volodymyr Zelenskyy, forseti Úkraínu, hvatt Vesturlönd enn einu sinni til að leyfa Úkraínumönnum að nota vopnagjafir frá Vesturlöndum til árása á rússneskt landsvæði. Þannig geti þeir tekist á við sókn Rússana.

Umræðan um þetta fór á mikið flug í síðustu viku, ekki síst eftir að Jens Stoltenberg, framkvæmdastjóri NATÓ, hvatti aðildarríki bandalagsins til að heimila Úkraínumönnum að nota vopnagjafirnar til árása á rússneskt landsvæði.

Nú hafa Bandaríkin, Bretland, Danmörk, Svíþjóð, Þýskaland og Frakkland veitt Úkraínumönnum heimild til að gera þetta.

Kenneth Buhl, hernaðarsérfræðingur við danska varnarmálaskólann, sagði í samtali við Jótlandspóstinn að þessi ákvörðun geti „breytt styrkleikahlutföllunum“ á milli Úkraínu og Rússlands og haft afgerandi áhrif á þróun mála í Kharkiv.

Hann sagði að þessi ákvörðun vestrænna ríkja geti meðal annars skipt máli varðandi svifsprengjurnar sem Rússar hafa notað af miklum móð síðustu mánuði. Framvegis eigi Úkraínumenn meiri möguleika á að flugvélarnar sem fljúga með svifsprengjurnar inn yfir Úkraínu. Það muni breyta styrkleikahlutföllunum mikið. Fram að þessu hafi Rússar næstum verið í skjóli á rússnesku landsvæði og því muni það hafa mikil áhrif að nú mega Úkraínumenn nota vestrænar vopnagjafir til árása á rússneskt landsvæði.