VAR var mikið á milli tannanna á fólki á leiktíðinni sem var að klárast í ensku úrvalsdeildinnni en breska götublaðið The Sun tók saman hvernig stöðutaflan hefði litið út án tækninnar.
Það er ekkert stórt sem breytist þó VAR ákvarðanir séu teknar út fyrir sviga. Efstu fimm líta alveg eins út, sem og liðin sem falla í B-deildina.
Newcastle hefði þó náð Evrópusæti án VAR. Liðið á hins vegar enn möguleika á að fara í Sambandsdeildina ef Manchester United mistekst að vinna enska bikarinn um helgina. Liðið mætir grönnum sínum í City í úrslitaleiknum.
Brighton fékk að kenna illa á VAR og hefði fengið fimm stigum meira án þess. Liðið væri þó aðeins sæti ofar.
Það er ekki ljóst hvort VAR verði notað í ensku úrvalsdeildinni á næstu leiktíð. Wolves lagði fram breytingartillögu á dögunum um að hætta með kerfið en 14 lið af 20 þurfa að samþykkja svo það gangi í gegn.
