Manni sem ákærður er fyrir peningaþvætti hefur verið birt fyrirkall og ákæra í Lögbirtingablaðinu, en ekki hefur náðst til mannsins til að birta honum ákæruna.
Maðurinn, sem er 44 ára og frá Lettlandi, er sakaður um að hafa tekið við 41.585 evrum (um 6 milljónir og 250 þúsund íslenskar krónur) frá óþekktum aðila og segir í ákæru að hann hafi mátt vita að um var að ræða ávinning af sölu og dreifingu fíkniefna.
Hinn ákærði var með féð á sér þegar hann var handtekinn á Keflavíkurflugvelli 6. nóvember árið 2023, en hann var þá að fara í flug til Varsjá í Póllandi.
Í ákærunni segir: „Þess er krafist að ákærði verði dæmdur til refsingar og til greiðslu alls sakarkostnaðar. Þá er þess krafist að gerðar verði upptækar með dómi samtals 41.585 evrur sem lögregla fann og haldlagði og varðveittar eru sem innistæða á bankareikningi lögreglustjórans á Suðurnesjum auk vaxta og verðbóta af framangreindri fjárhæð frá 6. nóvember 2023 til greiðsludags samkvæmt heimild í 69. gr. og 69. gr. b. almennra hegningarlaga nr. 19/1940.“
Fyrirtaka verður í málinu við Héraðsdóm Reykjaness þann 25. júní næstkomandi.
