Óvíst er hvort KA muni una niðurstöðu í dómsmáli Arnars Grétarssonar gegn félaginu, 433.is hefur fengið staðfest að félagið íhuga alvarlega að áfrýja málinu. Lögfræðingar segja þó í samtali að miðað við dóminn sé hæpið að KA nái einhverju öðru fram með því.
KA var í vikunni dæmt til að greiða Arnari tæpar 11 milljónir króna vegna ákvæðis í samningi hans. Arnar varð samningslaus hjá KA undir lok árs árið 2022 en KA afþakkaði vinnuskyldu frá honum síðustu vikur tímabilsins.
„Tryggi KA sér þátttökurétt fær þjálfari sem nemur 10% af allri þeirri fjárhæð sem félag fær greitt frá UEFA vegna þátttöku í Evrópukeppni. Þetta á eingöngu við það fjármagn sem er vegna leikjanna, en nær ekki til ferðagreiðslna eða þeirra greiðslna sem eru óháðar leikjum í Evrópukeppni,“ sagði í samningi Arnars við KA.
Það var Héraðsdómur Norðurlands sem felldi dóminn en KA getur áfrýjað málinu til Landsréttar. Lögfræðingur sem 433.is ræddi við segir ákvæðið skýrt, á því sé enginn vafi að KA sé bótaskylt í málinu og að áfrýjun muni að öllum líkindum engu skila nema meiri kostnaði fyrir félagið.
Samkvæmt heimildum 433.is vildi Arnar ekki fara með málið fyrir dómstóla og bauð KA að leysa málið. Þetta boð Arnars afþakkaði KA.
Vörn KA byggðist meðal annars á því að Arnar ætti aðeins að fá greiðslur fyrir að koma KA í Evrópukeppni en ekki fyrir það að liðið komst í þriðju umferð. Dómurinn taldi það ekki halda vatni. „Að mati dómsins er ekkert í orðalagi ákvæðisins sem rennir stoðum undir þann skilning stefnda að rétturinn takmarkist við greiðslur vegna fyrstu umferðar Evrópukeppninnar,“ segir í dómnum.
Arnar var enn á launaskrá hjá KA þegar félagið tryggði sinn í Evrópukeppni og stýrði liðinu í 22 af 27 leikjum tímabilsins. Félagið afþakkaði hins vegar starfskrafta hans undir lok tímabilsins þegar Arnar hafði átt í viðræðum um að taka við Val þar sem hann er þjálfari í dag.
KA fékk í heild 850 þúsund evrur fyrir þáttöku í Evrópukeppni en 300 þúsund evrur fóru í ferðakostnað. Fær Arnar því 10 prósent af þeim 550 þúsund evrum sem félagið fékk samkvæmt dómi héraðsdóms.
