Manchester United hefur áhuga á Ollie Watkins, sóknarmanni Aston Villa og íhugar að reyna við hann í sumar. Talksport heldur þessu fram.

Watkins hefur farið á kostum með Villa á leiktíðinni og er með 19 mörk í ensku úrvalsdeildinni. Spilaði hann stóra rullu í að liðið tryggði sig inn í Meistaradeild Evrópu fyrir komandi leiktíð. Ansi stórt afrek sem ekki margir sáu fyrir.

Sir Jim Ratcliffe er orðinn hluthafi í United og tekinn yfir knattspyrnuhlið rekstursins. Hann er metnaðarfullur og vill fá Watkins til liðs við félagið. Markmiðið er að styrkja liðið fram á við.

Það verður þó ansi snúið að fá Watkins í ljósi þess að Villa getur boðið honum upp á Meistaradeildarbolta á næstu leiktíð, eitthvað sem United getur ekki gert.

Þá skrifaði hann nýverið undir samning til 2028. Villa er því allavega í ansi sterkri stöðu ef kemur til viðræðna á milli félaganna.