Maðurinn var ákærður fyrir að hafa ekið undir áhrifum áfengis langt yfir leyfilegum hámarkshraða með þeim afleiðingum að hann missti stjórn á bifreiðinni. Fór hún þvert yfir báðar akreinar vegarins og hafnaði utan vegar og valt fjórar veltur. Í ákæru kemur fram að bifreiðinni hafi verið ekið á allt að 174 kílómetra hraða þar sem leyfður hámarkshraði var 90 kílómetrar á klukkustund.
Fjallað var um slysið í skýrslu rannsóknarnefndar samgönguslysa í október síðastliðnum.
Þrír farþegar voru í bifreiðinni auk ökumanns en farþegi sem sat í miðju aftursæti, tvítug kona, lést í slysinu. Farþegar í framsæti og vinstra aftursæti slösuðust alvarlega og voru fluttir með þyrlu á bráðamóttöku í Fossvogi. Ökumaðurinn slasaðist ekki alvarlega en var undir eftirliti læknis á Kirkjubæjarklaustri eftir slysið. Í ákæru kemur fram að vínandamagn í blóði hafi verið 1,23‰.
Maðurinn játaði brot sitt skýlaust fyrir dómi en í dómi héraðsdóms, sem féll þann 2. maí síðastliðinn, er tekið fram að maðurinn hafi sýnt mikla iðrun og ljóst sé að sakarefni málsins hafi verið honum þungbært.
„Refsing ákærða er hæfilega ákveðin fangelsi í níu mánuði. Að virtum atvikum máls og að teknu tilliti til skýlausrar játningar ákærða og þess að hann hefur ekki áður sætt refsingu, þykir rétt að fresta fullnustu sex mánaða refsingarinnar og skal sá hluti hennar falla niður að liðnum tveimur árum haldi ákærði almennt skilorð,“ segir í dómnum.
Manninum var einnig gert að greiða samtals níu milljónir króna í miskabætur vegna slyssins og 1,3 milljónir til viðbótar í skaðabætur. Loks var honum gert að greiða rúmar 1,8 milljónir króna í sakarkostnað.
