Leyniþjónustur ýmsa ríkja sem styðja við Úkraínu hafa varað við því að líkur séu á því að rússneskir hermdarverkamenn séu nú gerðir út af örkinni frá Moskvu til þess að fremja skemmdarverk í ríkjunum. Þetta kemur fram í umfjöllun Daily Mail en ýmis tilvik á síðustu mánuðum renna stoðum undir þessa kenningu.

Þannig hafa dularfullir eldsvoðar blossað upp í verksmiðjum sem framleiða hergögn sem rata til Úkraínu auk þess sem netárásir og ýmis önnur skemmdarverk á innviðum hafa dunið yfir. Í mars var til að mynda kveikt í vöruhúsi í austur-London þar sem geymd voru hjálpargögn ætluð Úkraínu. Tveir menn voru handteknir vegna atviksins og er talið að þeir hafi tengsl við Rússland. Í apríl varð síðan sprenging í Suður-Wales, í eigu hergagnaframleiðandans BAE Systems, en þar voru framleidd hergögn sem ratað hafa til Úkraínu. Þá hafa átt sér stað svipuð atvik í Bandaríkjunum og Þýskalandi.

„Fullt af eldsvoðum sem við töldum að væru óhöpp eða einangruð tilvik reyndust svo tengjast,“ hefur miðillinn hefur ónefndum heimildarmanni sem bætti við að ýmislegt benti til að Rússar réðu dæmda glæpamenn og hægri öfgamenn í þessi verkefni.

Sagði viðkomandi að tjónið hingað til hefði verið minniháttar en aðferðirnar bentu til þess að Rússar væru orðnir mun árásargjarnari og fífldjarfari en áður. Því væru menn uggandi yfir.