Andy Madley mun dæma úrslitaleik enska bikarsins milli Manchester United og Manchester City. Ekki er langt síðan stjóri fyrrnefnda liðsins, Erik ten Hag, lét hann heyra það.
Leikurinn fer fram 25. maí en United á möguleika á að bjarga skelfilegu tímabili sínu í öðrum keppnum. Liðið er í áttunda sæti ensku úrvalsdeildarinnar og gæti hæglega verið að missa af Evrópusæti.
City og United mættust síðast 3. mars og vann fyrrnefnda liðið 3-1 sigur. Eftir leik lét Ten Hag Madley einmitt heyra það vegna brots sem ekki var dæmt á Kyle Walker á Marcus Rashford og vítaspyrnu sem hann vildi að Alejandro Garnacho fengi eftir viðskipti við markvörðinn Ederson.
Ten Hag þarf að vonast til að Madley verði með allt á hreinu 25. maí á Wembley.
