Hann heitir réttu nafni Ismail Abdo og er miðpunkturinn í blóðugum átökum sænskra glæpagengja og því að lauma útsendurum glæpagengis hans inn í raðir sænsku lögreglunnar.
Dagens Nyheter fjallaði um málið og segir að tvær konur hafi verið gerðar út af örkinni og hafi náð að komast í sænsku lögregluna. Önnur þeirra er sögð vera unnusta „Jarðarbersins“ sem hefur árum saman háð blóðugt stríð við fyrrum bandamann sinn „Kúrdíska refinn“. Þetta stríð hefur kostað tugi manna lífið í Svíþjóð og utan Svíþjóðar.
Konurnar eru báðar ungar að árum og koma úr innflytjendafjölskyldum. Talið er að þær hafi annað hvort verið beðnar um að sækja um inngöngu í lögregluskólann eða neyddar til þess.
Þeim tókst að komast í gegnum nær allt námið áður en upp komst um þær, þar á meðal tengsl þeirra við „Jarðarberið“.
Það komst upp um þær þegar kom að því að fara yfir ferill þeirra en það er alltaf gert áður en fólk fær stöðu í lögreglunni. En þegar þarna var komið við sögu höfðu konurnar náð að afla sér mikillar vitneskju um starfsaðferðir lögreglunnar.
Svíum er að vonum mjög brugðið yfir þessu því lögreglan er ein af grunnstoðum samfélagsins og fólk á að geta treyst henni og því sem hún gerir.
