Jose Bordalas, stjóri Getafe, telur að Mason Greenwood líði afar vel hjá félaginu. Leikmaðurinn hefur þó orðið fyrir nokkru áreiti í leikjum undanfarið.

Greenwood er á láni hjá Getafe frá Manchester United en hann á sennilega enga framtíð hjá enska félaginu vegna mála hans utan vallar. Það er einmitt vegna þeirra sem Greenwood verður fyrir áreiti frá stuðningsmönnum annarra liða á Spáni.

Undanfarið hefur hann verið kallaður nauðgari og hann hvattur til að taka eigið líf til að mynda.

„Hann er rólegur, glaður og það er mjög vel komið fram við hann hér. Hann hefur sýnt frábæra hegðun á tíma sínum hér og liðsfélagar hans hjálpa honum líka,“ segir Bordalas en viðurkennir að Greenwood geti sennilega ekki látið köllin sem vind um eyru þjóta.

„Ég er viss um að köllin hafi áhrif á hann. Þið vitið mína skoðun, ég er á móti hvers konar áreiti, sama hver leikmaðurinn er. Meira get ég ekki sagt.“