Það eru flestir lesendur hér sem kannast við Brasilíumanninn Kaka sem gerði garðinn frægan með liðum á borð við AC Milan og Real Madrid.
Kaka átti eitt sinn eiginkonu að nafni Caroline Celico en þau voru gift í heil tíu ár áður en þau tóku ákvörðun um að skilja.
Saman eignaðist parið tvö börn en það var ákvörðun Celico að skilja við Kaka, þó hann hafi í raun ekki gert neitt af sér – fyrir utan það að vera frábær eiginmaður.
Frásögn Celico er í raun ótrúleg en þau skildu árið 2015 en samband fyrrum hjónanna er ágætt í dag og hafa þau bæði fundið ástina annars staðar.
,,Kaka sveik mig aldrei, hann kom svo vel fram við mig og við eignuðumst fallega fjölskyldu en ég var ekki ánægð, það vantaði upp á eitthvað,“ sagði Celico.
Það var næsta setning konunnar sem vakti hvað mesta athygli en hún vill meina að Kaka hafi einfaldlega verið ‘of fullkominn’ og því gekk hjónabandið ekki upp.
,,Vandamálið í stóra samhenginu var einfaldlega að hann var of fullkominn fyrir mig og þetta samband.“
Kaka er í dag trúlofaður Carolina Dias en þau byrjuðu samband sitt árið 2017 og eiga saman eina dóttur.
