Dani Alves var í miklu uppáhaldi hjá mörgum á sínum tíma en hann gerði garðinn frægan sem leikmaður Barcelona.

Alves var nýlega dæmdur í fangelsi fyrir nauðgun en atvikið átti sér stað á næturklúbbi í desember árið 2022.

Brasilíumaðurinn hefur áfrýjað niðurstöðunni en hann var dæmdur í fjögurra og hálfs árs fangelsi.

Alves var leystur úr haldi á dögunum en ónefndur maður þurfti að borga eina milljón evra fyrir tímabundið frelsi leikmannsins.

Samkvæmt fregnum dagsins þá ákvað Alves að fagna því með því að halda risastóra veislu á eigin heimili fyrir fjölskyldu og vini – aðeins degi eftir að hafa verið látinn laus.

Þar var drukkið og dansað alla nóttina en samkvæmt spænskum miðlum endaði veislan klukkan fimm að nóttu til.

Alves er fertugur að aldri en hann lagði skóna á hilluna á síðasta ári. Hann sat inni í um fjórar vikur áður en hann var látinn laus tímabundið.