Slökkvilið víða um Rússland hafa haft í nægu að snúast að undanförnu við að slökkva elda í olíuhreinsistöðvum, vopnaverksmiðjum og fleiri innviðum. Eldana má rekja til drónaárása.

Nýlega var gerð drónaárás á olíuhreinsistöð í Tuapse við Svartahafsströnd Rússlands. Úkraínumenn hafa lýst yfir ábyrgð á árásinni en við hana notuðu þeir fjölda dróna.

Ekki er langt síðan drónaárás var gerð á olíubirgðastöð í Sankti Pétursborg sem er langt frá úkraínsku landamærunum. Þá sagði úkraínskur ráðherra, Oleksandr Kamysiin, að dróni hefði flogið 1.250 km áður en hann hitti skotmark sitt við rússneska stórborg.  Hann kom þá einnig með aðvörun: „Ég er viss um að á þessu ári munum við sjá fleiri atburði af þessu tagi.“

Ekki er annað að sjá en hann hafi verið sannspár því fregnir hafa borist af álíka árásum víða í Rússlandi.

Aðfaranótt 18. janúar var árásin, sem Kamysiin nefndi, gerð á olíubirgðastöðin við Sankti Pétursborg.

Degi síðar kviknaði í fjórum olíutönkum í birgðastöð í Bryansk héraðinu eftir drónaárás. Kyiv Post skýrði frá þessu.

Þennan sama dag var gerð drónaárás á eina stærstu skotfæraverksmiðju Rússa en hún er í Tambov.

Degi síðar var röðin komin að vopnaverksmiðju í Tula að sögn Kyiv Post. Þar eru meðal annars framleidd flugskeyti.

Og daginn eftir var ráðist á gasstöð í bænum Ust-Luga við Eystrasalt.

Þar á eftir kom röðin að olíubirgðastöð í Tuapse. Reuters hefur eftir heimildarmanni innan úkraínsku leyniþjónustunnar að drónar hafi hæft stöðina.