Morgunblaðið skýrir frá þessu í dag og segist hafa heimildir fyrir þessu. Grímur Grímsson, yfirmaður miðlægrar deildar lögreglunnar, sagðist ekki vilja staðfesta orðróm um ákveðin mál af þessu tagi en sagði brögð hafa verið að því að lögreglumenn hafi þurft að gista utan heimilis síns vegna hótana sem þeir hafa fengið vegna starfa sinna.
Hann sagði að síðasta sumar hafi verið kveikt í bíl lögreglumanns og er íkveikjan talin tengjast starfi hans. Í desember var bíll annars lögreglumanns skemmdur og er skemmdarverkið talið tengjast störfum hans.
„Almennt séð get ég sagt að það eru brögð að því að það sé verið að hóta lögreglumönnum, beint og óbeint,“ sagði hann.
Hann sagðist telja að ástandið í undirheimunum fari síversnandi og það komi meðal annars fram í hótunum gegn lögreglumönnum. „Það liggur fyrir í gögnum lögreglu að það er mun oftar sem lögregla er að vopnast. Útköll sérsveitar eru mörg og fer fjölgandi milli ára, þannig að við metum það svo að það sé aukin harka í samfélaginu, og hægt að tala um undirheima í því samhengi,“ sagði Grímur.
Hann sagði aukna notkun skotvopna vera áhyggjuefni og ljóst sé að málum af þessu tagi hafi fjölgað og það verði að bregðast við því: „Það er mín skoðun að sakleysi íslensks samfélags sé horfið og í ljósi þess þýðir ekki að vera með vanmannaða lögreglu.“
